ملڪ تي انهن خاندانن جي حڪومت آهي، جيڪي ذاتي مفادن کي ملڪي مفادن تي ترجيح ڏين ٿا. مصطفيٰ ڪمال

ملير( رپورٽ درياخان شر) جمهوريت جي مضبوطي لاءِ بااختيار حڪومت انتهائي اڻٽر آهي، حڪومت جي ناقص فيصلن جي ڪري عوام جي زندگي گذارڻ مشڪل ٿي وئي. پاڪستاني عوام مھانگائي جي طوفان کي منھن ڏئي رھيو  آھي. مصطفيٰ ڪمال تفصيل موجب پاڪ سرزمين پارٽي جي ضلعي ڏکڻ ۾ ريلوي گرائونڊ ۾ افطار پارٽي ٿي جنھن ۾ پارٽي چيئرمين مصطفيٰ ڪمال، انيس قائم خاني, اشفاق منگي , شبير قائم خاني, سيد آصف حسنين, فوزيه حامد, صدر لایئرز فورم ابراھیم ابڙو ایڊووڪیٽ ۽ ٻيا مرڪزي عھديدار موجود هئا.هن موقعي تي زندگيء جي مختلف شعبن سان تعلق رکندڙ وڏي تعداد ۾  ماڻهن ۾ شرڪت ڪئي. صدر لایئرز فورم ابراھیم ابڙو ایڊووڪیٽ ايم ڪيو ايم جي سنڌ ورهائڻ وارن نعرن کي رد ڪندي چيو آهي ته سنڌ صدين کان هڪ آهي، امن جي ڌرتيءَ تي نئون صوبو نه ٺهندو، سنڌين جا مهاجرن تي وڏا احسان آهن، سنڌي ڀائرن سان گڏجي ايم ڪيو ايم جي سنڌ دشمن سازشن جو هر موڙ تي ڄمي مقابلو ڪنداسين. ايم ڪيو ايم وارا عمران سرڪار کي پنهنجي مرضيءَ سان ڇڏي نٿا سگهن. اشفاق منگي چيو ته ايم ڪيو ايم هڪ ڀيرو ٻيهر سنڌ دشمنيءَ تي لهندي ڌار صوبي جو پراڻو راڳ آلاپي رهي آهي. پاڪ سرزمين پارٽي ايم ڪيو ايم جي اهڙي سنڌ ورهائڻ واري مطالبي کي اڳ به رد ڪري چڪي آهي، هاڻي به رد ڪري ٿي ۽ سنڌي ڀائرن سان گڏجي پنهنجي ڌرتيءَ جو تحفظ ڪرڻ لاءِ ايم ڪيو ايم جي هر سنڌ دشمن سازش جو ڄمي مقابلو ڪنداسين. هن چيو ته ايم ڪيو ايم مهاجرن جي نالي تي نئين صوبي جا نعرا هڻي نفرت پکيڙڻ چاهي ٿي، پر سنڌ جي تاريخ اسان کي اهو ٻڌائي ٿي ته سنڌين جا مهاجرن تي وڏا احسان آهن. انيس قائم خاني چيو ته نننڍي کنڊ جي ورهاڱي وقت سنڌ ۽ سنڌي ئي هئا، جن پنهنجون ٻانهون کولي اسان جي وڏن کي ڳلي سان لڳائي انهن جي نه رڳو آجيان ڪئي پر انهن کي کائڻ لاءِ ماني ۽ رهڻ لاءِ پنهنجي گهرن جا درواز به کولي ڏنا هئا، ان ڪري سنڌي اسان لاءِ مديني جي انصارن جهڙو درجو رکن ٿا، پنهنجي ڀائرن سان نفرت نه پر محبت جي رشتي کي وڌيڪ مضبوط ڪرڻ چاهيون ٿا. پاڪ سر زمين پارٽي جي چيئرمين سيد مصطفيٰ ڪمال چيو آهي ته جمهوريت جي مضبوطي لاءِ بااختيار ۽ اثرائتي مقامي حڪومت انتهائي اڻٽر آهي، هڪ بيان ۾ مصطفيٰ ڪمال چيو ته ملڪ ۾ ڪجهه خاندانن جي حڪومت آهي جيڪي پنهنجي ذاتي مفادن کي ملڪي مفادن تي ترجيح ڏيندا آهن ۽ ان سبب جمهوريت جا فائدا ماڻهن تائين نه پهچڻ ڏيندا آهن، جنهن سبب عام شهرين وٽ شهر، ٽائون يا يوسي جي سطح تي پنهنجا بنيادي مسئلا حل ڪرڻ جا اختيار نه هوندا آهن، اهو ئي سبب آهي ته هو خراب حالتن ۾ زندگي گذارڻ تي مجبور آهن، هن چيو ته غير موثر بلدياتي نظام سبب اڄ شهرين کي پاڻي، صحت، پارڪ، پاڻي جي نيڪالي جو نظام، شهر ۾ صفائي ۽ تعيلم وغيره جهڙن بنيادي سهولتن کان محروم آهي، موجوده بلدياتي نظام  بلڪل غير موثر آهي، جنهن ۾ عوام وٽ چونڊيل نمائندن وٽ عوامي مسئلا حل ڪرڻ جا اختيار ۽ وسيلا موجود ناهن جيڪي پاڪستان جي آئين ۽ جمهوري روايتن جي خلاف آهن، مصطفيٰ ڪمال وڌيڪ چيو ته وڌيڪ تباهي کان بچڻ لاءِ بنا ڪنهن دير آئين ۽ قانون ۾ تبديلي ڪري ان ڳالهه کي يقيني بڻايو وڃي ته هر صوبو پي ايف سي (صوبائي مالياتي ڪميشن) ايوارڊز ذريعي مالي وسيلن بلدياتي حڪومتن کي منتل ڪيو وڃي، ۽ وفاق پاران جاري ايف ايف سي ايوارڊ سان به ڪارڪردگي موجب مقامي حڪومتن کي مالي وسيلا مهيا ڪيا وڃن ته جيئن بلدياتي حڪومتن جي ڪارڪردگي بهتر ٿئي.اپوزيشن جون اهي پارٽيون آهن، جن پنهنجي حڪومتي دورن ۾ به عوام ۽ ملڪ لاءِ ڪجهه نه ڪيو، هن چيو ته جيڪڏهن قوم پي ايس پي کي هڪ موقعو ڏنو ته اسان ملڪي معيشت سميت سمورن بحرانن کي حل ڪري ڏيکارينداسين